Kalambigitan sa Tanan

Ubay-ubay nga katawhan karon ang nagkatag, tungog sa pagkabungkag sa ilang katilingban, sa ilang yuta, tungod ba sa katalagman gama sa tawo o kinaiyahan, tungod pod sa dagan sa kolonisasyon kaniadto ug globalisasyon karon.

Dakong impluwensiya sa kalibotan ang globalisasyon sa ekonomiya. Ginansiya ang importante, labaw sa tanan. Nahalap na sa ubang mga bililhon sa kinabuhi, sa kultura, katilingban, o sa tawo tungod
sa sulaw sa bulawan. Dakong gahom ang kwarta sa kalibotan karon. Apan ang bulag nga gamhanan mobangga sa tanang maagian sa iyang atubangan.

Dako ang krisis sa pinansiya karon sa tibuok kalibotan. Dayag nga ang nanghawod nga ekonomista
wala naghupot sa tanang tubag o solusyon. Dili lamang ekonomiya ang kinabuhi sa tawo. Dili lamang ginansiya.

Kon tungod sa kwarta, madaot ang kinabuhi sa kalibotan, maparot ang kinaiyahan, mahanaw ang kadaiyahan sa mga kultura, katawhan, pinulongan, o panglantaw sa kinabuhi ug pamaagi sa pagkinabuh, moabot tingali ang panahon nga makaamgo ta nga dili mausap ang kwarta. Unsay pulos kwarta kon wala nay mapalit, kon ang abot sa yuta mikunhod, kay nadaot ang yuta, o kaha nahugawan o nahiloan sa polusyon nga gibubo sa mga korporasyon diha sa iyang kasapaan ug kabukiran.

Balik ta sa katawhan, sa lokal nga katingban, kay sila gyod ang manalipod sa ilang yuta, sa ilang palibot ug puloy-anan. Kay sila gyod pod ang lunopan, mahiloan, mag-antos sa mga katalag man,kagutom, ug sa epekto sa kabangis sa tawo diha sa iyang kinaiyahan ug isigkaingon. Angay balikan gyod ang kaugalingong pag-ila sa palibot, sa kinabuhi, sa isigkaingon, sa kinaiyahan.

Balik sa pag-atiman sa maayong gawi ug kinaiya sa katawhan, sa iyang kultura ug pinulongan, kay dinhi nahipos ang mga kaamgohan ug kasayoran kon unsaon pag-atiman sa palibot, sa yuta ug sa isigkaingon. Kay ang kaalam nga nahipos diha sa pinulongan, maoy panglantaw sa kinabuhi nga nahilambigit gyod sa dapit nga gipuy-an ug sa katilingban nga gikahimugsoan.

Atimanon ang pinulongan kay aron mahibalik sa kaamgohan ang katawhan, nga maoy moatiman sa ilang yuta, ug sa tanan, lakip nang pagpalambo sa iyang kalibotan sa kultura ug pinulongan. Ang pinulongan, katawhan, ug yuta nga puloy-nan nagkalambigitanay.

Kon madaot ang kalambigitan, mameligro ang tanan.